Банктар бирикмеси - банктык карталарды колдонуу коопсуздугун эске салат
Кыргызстан банктарынын бирикмеси тааныш эмес сайттарда төлөм карталары менен операцияларды өткөрүүдөн баш тартууну жана төлөм жүргүзүлүүчү ресурстарды кылдаттык менен изилдөөнү сунуштайт.
Маалыматка ылайык, интернет тармагында жана социалдык тармактарда банктык карталарды колдонуу аркылуу алдамчылыктын бир түрү күч алууда. Алдамчылар колдонуучуларга ар түрдү сурамжылоолорго же сыйлык ыйгарылуусуна кепилдик берген утуштарга катышууну сунуш кылып жатышат. Сурамжылоого катышуу үчүн картанын жеке маалыматын киргизүү жана комиссияны төлөө талап кылынат.
Ошондой эле маалыматта товар жана кызмат көрсөтүүлөр үчүн онлайн төлөм өткөрүүдө төмөнкү коопсуздук чараларын сактоо сунушталат:
– төлөмдөрдү белгилүү дүкөндөрдүн сайттарынан же текшерилген интернет-ресурстардан өткөрүү;
– адатта төлөм жүргүзүлө турган операцияларын санына / суммасына чектөө коюу;
– интернет-банкинг жана смс-кабарлоону туташтыруу;
– төлөм жүргүзүлүп жаткан түзмөктөрдө антивирустук программалардын өз убагында жаңыртылышын көзөмөлдөө;
– банктык картанын берилмелерин үчүнчү жактарга бербөө;
– белгисиз адамдардын суроо-талабына жооп катары каражаттарды которбоо жана чегербөө.
Банктык карталарды колдонууда коопсуздук чараларын сактоо, картадагы акча каражаттардын сакталышын камсыз кылат!
