Бажылык тариздөө мыйзамдарын бузган эки компания мамлекетке 5,7 млн сом төктү
Мамлекеттик бажы кызматынын Контрабандага каршы күрөшүү башкы башкармалыгы товарларды бажылык тариздөөсүз мыйзамсыз пайдалануу фактыларын аныктады.
Нарын шаарында убактылуу сактоого коюлган 18 тонналык майдалагыч жабдуу тиешелүү төлөмдөрү төлөнө электе эле ишкана тарабынан орнотулуп, пайдаланылып жаткандыгы белгилүү болгон.
Ошондой эле "Ч.Ю." жана "Д.Д." компаниялары жооптуу сактоодо турган жалпы салмагы 100 тоннадан ашык курулуш материалдарын бажылык тариздөөдөн өткөрбөй туруп, курулуш иштерине иштетип жиберишкен.
Натыйжада Евразия экономикалык биримдигинин Бажы кодексинин талаптарын бузгандыгы үчүн аталган компанияларга бажы алымдарын жана салыктарын төлөө милдети жүктөлгөн. Көрүлгөн чаралардын негизинде мамлекеттик бюджеттин кирешесине 5 млн 705 миң 550 сом өндүрүлдү.
Учурда топтолгон материалдар Башкы кызматынын Тергөө башкармалыгына өткөрүлүп берилди.
