М.Тургунбаев: Бардык колдонуучуларга тиешеси бар маанилүү чечим кабыл алынды
КРнын Улуттук банкынын башкармасы кабыл алган токтомго ылайык, мобилдик тиркемелер жана интернет-банкинг аркылуу жүргүзүлгөн улуттук валютадагы ички акча которуулар үчүн алынуучу комиссиялар эми жокко чыгарылат. Мындай билдирүүнү Улуттук банктын төрагасы Мелис Тургунбаев жеке баракчасында жарыялады.
Анын айтымында 2026-жылдын 1-январынан 31-декабрына чейин банктар жана төлөм уюмдары мындай операциялар үчүн жеке жактардан комиссия ала алышпайт.
“Бул документте эсеп ачпастан жүргүзүлгөн эл аралык акча которуулар тууралуу пункт дагы бар. 2026-жыл бою банктар жана төлөм уюмдары Кыргызстандын аймагында мындай которууларды ар кандай валютада алган адамдардан комиссия ала алышпайт. Бул кадам керектөөчүлөрдү коргоого жана чет өлкөдөн акча алган жарандар үчүн чыгымдарды кыскартууга багытталган”-деп билдирген, Улуттук банктын төрагасы.
Ошондой эле М.Тургунбаев санарип каржы кызматтарынын ар бир адамга жеткиликтүү болушун, накталай эмес төлөмдөрдүн өсүшүн мындан ары да күчөтүш үчүн кызуу иштерди уланта бере тургандыгын билдирди.
