Бир нече автоунааны, 4 миң долларды алдап алган жаран кармалды
Бишкек шаардык ички иштер башкы башкармалыгынын (БШИИБ) ыкчам кызматкерлери өзгөчө ири өлчөмдө жасалган алдамчылыктардын сериясына шектүү жаранды кармашканын мекеменин басма сөз кызматы билдирди.
Милициянын маалыматына ылайык, 2026-жылдын 15-январында Свердлов райондук ички иштер башкармалыгына жоопкерчилиги чектелген коомдун өкүлү арыз менен кайрылган. Ал жаран А. А.га карата чара көрүүнү суранган.
Арызда көрсөтүлгөндөй, 9-январда Э. Б. компаниянын өкүлдөрүнүн ишенимине кирип, Хоргос – Москва – Белгород багыты боюнча автоунааларды жеткирүү шылтоосу менен жалпы баасы 159 270 долларды түзгөн төрт автоунааны, ошондой эле 4 000 долларды өзүнө ыйгарып алган.
БШИИБден билдиришкендей, шектүү макулдашылган маршрутту атайылап бузуп, “Дунларова” чек ара бекети аркылуу Кыргызстандын аймагына кирип, автоунааларды өз каалоосу боюнча пайдаланган. Тергөөнүн версиясына ылайык, алынган каражаттарды жеке муктаждыктарына жумшаган.
Аталган факт боюнча Кылмыш-жаза кодексинин 209-беренеси (“Өзгөчө ири өлчөмдөгү алдамчылык”) менен кылмыш иши козголду.
Тергөөнүн жана ыкчам-издөө иш-чараларынын жүрүшүндө ШИИБдин кызматкерлери 1988-жылы туулган шектүү А. А.ны кармашкан. Ал Свердлов райондук ИИБинин тергөө кызматына жеткирилип, убактылуу кармоочу жайга камалган.
БШИИБден кошумчалашкандай, шектүү сата элек калган төрт автоунаа табылып, алынган. Унаалар атайын айып короого токтотулду. Ошондой эле кармалган жаран башка ушул сыяктуу алдамчылык фактыларына да тиешеси бар экени аныкталган.
