Эмне үчүн акча алмаштыруу бюролорунда акчаны нак эмес алмыштурууга болбойт?
Бүгүн “Ишкер медиа” Бишкек шаарындагы бир нече алмаштыруу бюросуна кайрылып, нак эмес акчаны алмыштурууга аракет жасады. Тагыраагы, төлөм карт же QR код аркылуу АКШ долларын сатып алуу мүмкүн болгон жок. Бардык акча алмыштуруучулар нак акча менен гана иш алып баруу мүмкүндүгүн билдирип, чет өлкө валютасын нак эмес сатуудан баш тартышты.
Азыр замандын талабына ылайык, көпчүлүк жарандар капчыктарын үйдө калтырып телефон же карта менен эле төлөм жүргүзүп калган кез. Ушуга байланыштуу Улуттук банкка, эмне үчүн акча алмаштыруу бюролорунда нак эмес акча алмыштурууга болбойт? – деген суроо менен кайрылып, жооп алдык.
Көрсө, Улуттук банк тарабынан акча алмаштыруу бюросуна берилүүчү лицензияда: акча алмаштыруу бюросу нак чет өлкө валютасы жана нак кыргыз сому менен иш алып барат деп так белгиленген экен. Ал эми нак эмес акча алмаштыруу коммерциялык банктар аркылуу гана ишке ашырылаары белгилүү болду.
Белгилей кетсек, бүгүнкү күнгө карата, Кыргыз Республикасы боюнча жалпысынан 830 акча алмыштыруучу жай Улуттук банктын лицензиясын алып, мыйзамдуу негизде ишмердүүлүгүн жүргүзүп жатат.
