Ошто мыйзамсыз валюта алмаштыргандарга айып пул салынды
КРнын Улуттук банкы лицензиясы жок, чет өлкө валютасын алмаштыруу боюнча мыйзам бузууларга баргандар аныкталды. Ош шаары жана Араван районунун аймагында Улуттук банктан тиешелүү лицензия албай, накталай чет өлкө валютасын алмаштыруу операцияларын жүргүзгөн 10 жаранга чара көрүлдү.
Улуттук банктын маалыматына ылайык, Ош областтык башкармалыгы аныктаган бул мыйзам бузуулардын жыйынтыгында, 10 жарандын ар бирине - 17 500 сом өлчөмүндө айып пул салынды.
Мыйзам боюнча, валюта алмаштыруу операцияларын жүргүзүү үчүн сөзсүз түрдө атайын лицензия талап кылынат. Ошондой эле жарандарга валютаны расмий алмашуу жайларында гана жүргүзүшү шартталат. Бул коопсуздукту камсыздап, мыйзам бузуу тобокелдиктерин азайтат.
Азыркы учурда, КРнын аймагында Улуттук банктын лицензиясына ээ болгон 857 чет өлкө валютасын алмаштыруучу жай ишмердүулук жүргүзүп жатат.
