Улуттук банк акчаны адалдоого каршы талаптарды күчөтүүнү сунуштоодо
КРнын Улуттук банкы акчаны адалдоого, кылмыштуу кирешелерди легалдаштырууга жана кылмыштуу ишти каржылоого каршы аракеттенүү боюнча талаптарды жаңылоону сунуштады. Тиешелүү токтомдун долбоору коомдук талкууга чыгарылды.
Долбоор КРнын мыйзамдарын ФАТФтын эл аралык стандарттарына жана кылмыштуу кирешелерди легалдаштырууга каршы аракеттенүү боюнча Евразиялык топтун сунуштарына, КРнын Укук бузуулар жөнүндө кодексине, ошондой эле Улуттук банктын адистештирилген финансы уюмдарынын ишин лицензиялоо жана жөнгө салуу маселелери боюнча токтомуна шайкеш келтирүүгө багытталган.
Документте негизги өзгөрүүлөр катары төмөнкүлөр каралган:
- милдеттүү көзөмөлгө алынуучу операциялардын тизмесин кеңейтүү;
- кардарларды жана алардын бенефициардык ээлерин текшерүү талаптарын күчөтүү;
- жогорку тобокелдикке ээ өлкөлөргө карата кошумча чараларды киргизүү;
- тоңдурулган каражаттар боюнча аларды тоңдуруу жана аларга жеткиликтүүлүктү жөнгө салган механизмдерди өркүндөтүү;
- виртуалдык активдер менен операцияларга кошумча көзөмөл киргизүү;
- финансылык чалгындоо жана эл аралык кызматташтык механизмдерин өркүндөтүү.
Долбоорго ылайык, финансы-кредиттик уюмдар кардарлардын бенефициардык ээлери тууралуу маалыматтарды жаңыртууда мамлекеттик маалымат системаларын жана маалымат базаларын кайра текшерүүгө тийиш болот.
Эгер кардар тарабынан берилген маалыматтар менен көрсөтүлгөн системалардагы маалыматтардын ортосунда айырмачылыктар табылган болсо, алар белгиленген тартипте Финансылык чалгындоо органына тиешелүү маалыматты жиберүү боюнча чараларды көрүүгө милдеттүү.
Мындан тышкары, жаңы талаптар Улуттук банктын көзөмөлүндөгү адистештирилген финансылык уюмдарга да жайылтылат.
Токтом долбоору Улуттук банктын расмий сайтында жана koomtalkuu.gov.kg порталында 27-августка чейин коомдук талкууда болот.
