Таласта ишкерлерге мамлекеттик каржылоо механизмдери түшүндүрүлдү
Талас шаарында "Региондорду экономикалык өнүктүрүү" долбоорунун алкагында ишкерлер жана стартап идеясы бар жарандар менен маалыматтык жана B2B форматындагы жолугушуу өттү. Бул тууралуу “Мамлекеттик финансылык холдинг” ААКнан кабарлашты.
Маалыматка ылайык, иш-чарада “Мамлекеттик финансылык холдинг” ААКсынын ишмердүүлүгүнүн негизги багыттары, бизнести мамлекеттик каржылык колдоонун механизмдери жана жеңилдетилген каржылоону алуу шарттары тууралуу маалымат берилди.
Өзгөчө бюджеттик кредиттерге көңүл бурулду. Каржылоо жылдык 2% менен 20 млн сомго чейин, 10 жылга чейинки мөөнөткө берилери айтылды.
Жолугушууга «Мамлекеттик финансылык холдинг» ААКсынын башкармалыгынын төрагасынын орун басары Улан Гайыпов, Президенттин Талас облусундагы ыйгарым укуктуу өкүлүнүн биринчи орун басары Максат Байджигитов жана Талас шаарынын мэри Нургазы Асылбеков катышты.
Ишкерлер каржылоо шарттары жана мамлекеттик колдоо механизмдери боюнча өздөрүн кызыктырган суроолорго жооп алышты.
