Өлкөдө жарандарга каражат топтоо боюнча маалымат берилет
Бүгүн Кыргызстанда "Дүйнөлүк каражат топтоо күнүнө" арналган жыл сайын өтүүчү маалыматтык-билим берүү кампаниясы башталды. Бул тууралуу КРнын Улуттук банкынан билдирди.
Билдирүүгө таянсак, долбоор өлкөдө 2015-жылдан бери Улуттук банкытын координациясы астында ишке ашырылып келет.
Анда тиешелүү мамлекеттик органдар, финансы институттары, КРнын Депозиттерди коргоо боюнча агенттиги жана камсыздандыруу секторунун өкүлдөрү өнөктөш уюштуруучулар болуп саналат.
Демилгенин негизги милдети – калктын финансылык сабаттуулугун жогорулатуу, каражат топтоо маданиятын жайылтуу жана жарандардын жеке жана үй-бүлөлүк бюджетти сарамжалдуу башкаруусуна өбөлгө түзүү.
30-октябрга чейин созула турган кампаниянын алкагында Бишкекте жана республиканын бардык аймактарында окуу жана интерактивдүү иш-чаралар өтөт.
Катышуучуларга учурдагы каражат топтоо инструменттери, акча каражаттарын коопсуз сактоо ыкмалары жана көбөйтүү мүмкүнчүлүгү жөнүндө маалымат берилет.
