РФда - майда тыйындарды акчага алмаштыруу, КРда - жыйым топтоо өнөктүгү башталды
Россияда 26-октябрдан 7-ноябрга чейин "Монета жумалыгы" акциясы өтөт. Ал эми Кыргызстанда 26-октябрдан тартып Бүткүл дүйнөлүк жыйым топтоо күнүнө арналган финансылык сабаттуулук өнөктүгү өткөрүлөт. Эки өлкөнүн аталган ишчаралары, калктын финансылык сабаттуулугун жогорулатууга багытталат.
Россияда майда тыйындарды комиссиясыз алмаштыруу жумалыгы башталды
Россиядагы “Монета жумалыгы” акциясынын алкагында жарандар чогултуп жүргөн майда тыйындарын банктарда жана акцияга катышкан дүкөндөрдө комиссиясыз кагаз акчага алмаштыра алышат. Ошондой эле айрым банктар тыйындардын суммасын кардардын эсебине же банктык аманатына которуу мүмкүнчүлүгүн сунуштайт.
РИА Новости агенттигинин маалыматына ылайык, акцияга бир катар ири банктар, анын ичинде ПСБ, ВТБ, Газпромбанк, “Дом.РФ” жана Россельхозбанк катышууда. Россельхозбанк күзгү акциянын жыйынтыгында жалпы суммасы 19,6 млн рубль болгон кеминде 4,6 млн тыйын чогултууну көздөп жатат.
Мындай демилге жарандардын үйүндө топтолуп калган майда тыйындарды кайрадан жүгүртүүгө кайтарууга жана накталай акчаны пайдаланууну жеңилдетүүгө багытталган.
Кыргызстанда жыйым топтоо өнөктүгү старт алды
Кыргызстанда 26-октябрдан 30-октябрга чейин жыл сайын өтүүчү “Бүткүл дүйнөлүк жыйым топтоо күнү” аттуу маалыматтык-агартуучулук өнөктүгү башталды. Бул тууралуу Улуттук банктын Коомчулук менен иш алып баруу бөлүмүнөн маалымдашты.
Өнөктүктүн алкагында Бишкек шаарында жана өлкөнүн бардык аймактарында окутуучу жана интерактивдүү иш-чаралар өткөрүлөт. Катышуучулар аманат топтоонун жолдору, акчаны коопсуз сактоо жана каражаттарды көбөйтүү мүмкүнчүлүктөрү тууралуу маалымат алышат.
Өнөктүк Кыргызстанда 2015-жылдан бери өткөрүлүп келет. Ага Улуттук банк менен катар мамлекеттик органдар, финансылык мекемелер, Кыргызстандын Депозиттерди коргоо боюнча агенттиги жана камсыздандыруу тармагынын өкүлдөрү катышышат.
