Тогуз-Торо районунда өнөр жай өндүрүшү 3,4 млрд сомдон ашты
Өлкө лидери Садыр Жапаров бүгүн Жалал-Абад облусуна болгон иш сапарынын жүрүшүндө Тогуз-Торо районунун 2021–2026-жылдардагы социалдык-экономикалык өнүгүүсүнүн жыйынтыктары менен таанышты. Бул тууралуу президенттин администрациясы кабарлады.
Берилген маалыматка ылайык, Тогуз-Торо районунда өнөр жай өндүрүшүнүн көлөмү 2021-жылдагы 1 млрд 239,1 млн сомдон 2025-жылы 3 млрд 427,3 млн сомго чейин өстү.
2026-жылдын тогуз айында райондогу өнөр жай өндүрүшүнүн көлөмү 3 млрд 202,5 млн сомду түзгөн.
Ал эми жыл жыйынтыгы боюнча бул көрсөткүч 4 млрд 270 млн сомго жетери күтүлүүдө.
Мындан тышкары, 2026-жылы жалпы инвестициялык көлөмү 133 млн сомду түзгөн 3 долбоорду ишке ашыруу башталган. Алардын алкагында көмүр кенин өздөштүрүү жана эки асфальт-бетон заводун куруу каралып, 48 жумуш ордун түзүү пландалууда.
