Улуттук банк микрофинансылык уюмдардын өкүлдөрү менен жолугушту
27-октябрда Улуттук банктын төрагасы А. Бакетаев микрофинансылык уюмдардын жетекчилери, "Микрофинансы уюмдарынын ассоциациясы" жана "Кыргызстан банктарынын союзу" бирикмелеринин өкүлдөрү менен жолугушту. Бул тууралуу Улуттук банктын маалымат кызматы билдирди.
Маалымдалгандай, жолугушууда микрофинансы секторунун учурдагы абалы, көйгөйлөрү жана аны өнүктүрүү маселелери талкууланды.
Сектордун өкүлдөрү финансылык кызмат көрсөтүүлөрдүн сапатын жана жеткиликтүүлүгүн жогорулатуу, ошондой эле туруктуу өнүгүүгө ыңгайлуу шарттарды түзүү боюнча сунуштарын беришти.
Мындан тышкары, аймактардагы калкка жана ишкерлерге финансылык кызматтарды жеткиликтүү кылуу, керектөөчүлөрдүн укуктарын коргоо маселелерине көңүл бурулду.
Жыйынтыгында Улуттук банктын төрагасы мындай жолугушууларды мындан ары туруктуу негизде өткөрүү пландалып жатканын белгиледи.
