Ошто мыйзамсыз курулуш токтотулду
Бүгүн Ош шаарындагы К. Абдыразаков көчөсүнүн Б. Нурматов көчөсү менен кесилишкен жеринде мыйзамсыз жүргүзүлүп жаткан курулуш иштери токтотулду. Бул тууралуу мэриядан кабарлашты.
Текшерүү учурунда курулуштун тиешелүү муниципалдык жана мамлекеттик органдардын эч кандай уруксат берүүчү документи жок жүргүзүлүп жатканы аныкталган.
Шаардык мэрия билдиргендей, шаардын башкы планына ылайык бул аймак жашылдандыруу зонасы катары каралган. Мында төрт тилкелүү болуп кеңейтиле турган көпүрөнүн астындагы аймакты көрктөндүрүү жана жашылдандыруу долбоору бар.
Учурда курулуш иштерине толук бөгөт коюлуп, курулуш материалдары алынды.
Ош шаардык мэриясы бардык жарандарды жана ишкерлерди шаар куруу эрежелерин сактоого, уруксат кагаздары жок өзүм билемдик менен курулуш жүргүзбөөгө чакырат. Мыйзамсыз курулуштарга карата мыйзам чегинде катуу чаралар көрүлөрү эскертилди.
