Талас жана Баткенде финансылык сабаттуулук боюнча лекциялар өттү
Талас жана Баткен облустарында Дүйнөлүк каражат топтоо күнүнө карата мектеп окуучулары жана студенттер үчүн финансылык сабаттуулук боюнча лекциялар өткөрүлдү. Бул тууралуу Улуттук банктан билдиришти.
Маалыматка ылайык, 27–30-октябрь күндөрү Улуттук банктын Талас облустук башкармалыгынын өкүлдөрү Талас, Бакай-Ата, Айтматов жана Манас райондорундагы төрт мектептин жогорку класстарынын окуучуларына лекция өтүштү.
Ал эми 28-октябрда Улуттук банктын Баткен облусундагы өкүлчүлүгүнүн кызматкерлери Жусуп Баласагын атындагы Кыргыз улуттук университетинин Баткен кампусунун 1-курсунун студенттери менен жолугушту.
Иш-чараларда катышуучуларга акчаны туура пайдалануу, каражат топтоо, жеке жана үй-бүлөлүк бюджетти пландаштыруу, финансылык максаттарды коюу жана QR-код аркылуу төлөм жүргүзүү тууралуу маалымат берилди.
Ошондой эле кредит алууга өзүнө-өзү тыюу салуу, дропперлик, финансылык пирамидалар жана киберкылмыштуулуктан сактануу жолдору түшүндүрүлдү.
