Германия менен Улуу Британия Борбор Азиядагы климаттык долбоорго каражат бөлөт
Жаратылыш ресурстары министри Акыл Токтобаев Германиянын Эл аралык кызматташтык коомунун (GIZ) Кыргызстандагы жана Тажикстандагы өкүлчүлүгүнүн жетекчиси Виктор Вецель менен жолугушту. Бул тууралуу министрликтин басма сөз кызматы кабарлады.
Маалымдалгандай, жолугушууда айлана-чөйрөнү коргоо, туруктуу өнүгүү жана климаттын өзгөрүшүнө каршы күрөшүү боюнча кызматташтык маселелери талкууланды.
Жыйынтыгында тараптар "Борбордук Азияда климаттык тобокелдиктерди башкаруу" аймактык программасын ишке ашыруу боюнча макулдашууга кошумча документке кол коюшту.
Документке ылайык, Германия долбоорго 13 миллион еврого (болжол менен 1 млрд 266 млн сом) чейин, ал эми Улуу Британия 8 миллион фунт (болжол менен 936 млн сом) стерлингге чейин каражат бөлөт.
Долбоор Борбор Азиянын беш өлкөсүндө ишке ашырылып, бөлүнгөн каражаттар климаттык тобокелдиктерди башкаруу жана климаттын өзгөрүшүнө ыңгайлашуу мүмкүнчүлүктөрүн чыңдоого багытталат.
