Транспорт министрлигине 84 даана жаңы атайын техникалар тапшырылды
Транспорт жана коммуникациялар министрлигине 84 даана жаңы атайын техникаларды тапшырылды. Бул тууралуу минкаб кабарлады.
Техникаларды салтанаттуу тапшыруу аземинде министрлер кабинетинин төрагасынын орун басары Бакыт Төрөбаев жол тармагын өнүктүрүү, материалдык-техникалык базасын жаңылоо жана жакшыртуу максатында тиешелүү министрликке техникаларды алуу үчүн республикалык бюджеттен тийиштүү каражат бөлүнгөнүн билдирди.
«Мындай техниканын ишке кириши биздин жолдорду, инфраструктураны жакшыртууга жана коопсуздукту жогорулатууга зор мүмкүнчүлүктөрдү берет. Алдыга коюлган максаттарга жетүү үчүн ушул техниканы натыйжалуу колдонууну жана ага аяр мамиле жасоо аркылуу туура иштешин камсыз кылуу зарыл», - деди минкаб төрагасынын орун басары.
Ар бир чакырым жол – адамдар үчүн жаңы мүмкүнчүлүктөрдү ачаарын белгилеген Бакыт Төрөбаев быйылкы жылы жол тармагында аткарыла турган айрым иштерди кошумчалады.
