Чүйдө балык уулоо эрежелерин бузган жарандарга айып салынды
Жайыл району жана Суусамыр өрөөнүндө балык уулоо эрежелерин бузган жарандар аныкталды. Бул тууралуу Жаратылыш ресурстары, экология жана техникалык көзөмөл кызматы министрлигинен билдиришти.
Маалыматка ылайык, мыйзам бузуулар Чүй регионалдык башкармалыгынын кызматкерлери тарабынан жаратылышты коргоо боюнча жүргүзгөн рейд учурунда аныкталды.
Текшерүүнүн жүрүшүндө балык уулоо эрежелерин бузган жарандарга Укук бузуулар жөнүндө кодекстин негизинде эки протокол түзүлдү.
Мындан тышкары, синтетикалык тор колдонуу менен мыйзамсыз балык кармоо фактысы боюнча дагы бир протокол түзүлүп, күнөөлүү адамдарга айып салынды.
Рейддин алкагында жергиликтүү малчылар жана тургундар менен түшүндүрүү иштери да жүргүзүлдү. Аларга Министрлер кабинетинин тиешелүү токтомуна ылайык жайыттарды автоунаа, трактор, мотоцикл жана башка транспорт каражаттары менен тебелөөгө чектөө киргизилгени тууралуу маалымат берилди.
