Өкмөт башчы Бишкек ЖЭБинин ишин жана жылытуу сезонун текшерди
Министрлер Кабинетинин төрагасы Адылбек Касымалиев “Бишкек жылуулук электр борборуна” барып, жылытуу мезгилиндеги даярдык жана иштин жүрүшү менен таанышты. Бул тууралуу Өкмөттүн маалымат кызматынан билдиришти.
Маалыматка караганда, өкмөт башчысы объекттин үзгүлтүксүз иштөөсүн камсыз кылуу үчүн отун запасынын көлөмүнө жана сапатына өзгөчө көңүл бурган. Ага учурдагы көмүрдүн запасы жана аны толуктоо боюнча пландар тууралуу маалымат берилген.
Адылбек Касымалиев ошондой эле ЖЭБдин негизги өндүрүш бөлүмдөрүн — казан жана турбина жабдууларын көрүп чыгып, алардын жогорку жүктөм шартында иштөөгө даярдыгын текшерди.
Текшерүүдөн кийин МинКаб төрагасы Энергетика министрлигинин, Бишкек мэриясынын жана ишкана жетекчилигинин катышуусунда кеңейтилген жыйын өткөрдү. Ал жылытуу сезону үзгүлтүксүз өтүшү үчүн бардык тараптардын жоопкерчилигин күчөтүү зарылдыгын белгилеп, борборду ишенимдүү жылуулук менен камсыздоону тапшырды.
