Россиядан ЕАЭБ өлкөлөрүнө ири суммадагы акчаны кайсыл аэропорттор аркылуу алып чыгууга болот?
Россиядан Евразиялык экономикалык биримдикке (ЕАЭБ) кирген өлкөлөргө 100 миң доллардан ашык өлчөмдөгү накталай рублдарды 17 аэропорт аркылуу гана алып чыгууга уруксат берилерин Россия Каржы министрлигине шилтеме берүү менен "РосбизнесКонсалтинг" маалымдады.
Накталай акчаны алып чыгууга уруксат берилген аэропорттордун катарына Москванын негизги авиа түйүндөрү — Внуково, Домодедово, Шереметьево, ошондой эле Храброво (Калининград), Толмачево (Новосибирск), Баландино (Челябинск) кирет.
1-апрелден тарта ЕАЭБ өлкөлөрүнө накталай рублдарды алып чыгуунун өзгөчө тартиби күчүнө кирет.
Бул документтер президенттин жарлыгын аткаруунун алкагында даярдалган. Ага ылайык, ЕАЭБ өлкөлөрүнө — Беларусь, Казакстан, Армения жана Кыргызстанга накталай акчаны алып чыгууга чектөөлөр каралган.
Россиянын Каржы министрлиги жаңы эрежелер милдеттүү декларациялоону киргизбесин түшүндүрдү. Анын ордуна жарандар чек арадан өтүүдө акчанын мыйзамдуу келип чыгышын далилдеши керек болот. Бул үчүн банкоматтан алынган чек же карыз келишими сыяктуу документтер талап кылынат.
"Бул милдеттүү декларация эмес, ири суммадагы накталай акчанын мыйзамдуу келип чыгышын тастыктоо тууралуу болуп жатат", — деп белгилешти министрликте.
Эгер жарандар үчүн мындай документтер ири суммадагы акчаны алып чыгууда гана талап кылынса, уюмдар жана жеке ишкерлер үчүн — бардык учурларда милдеттүү болот.
