Кыргызстан COP30 саммитинде парник газдарын кыскартуу пландарын билдирди
Министрлер Кабинетинин төрагасынын орун басары Эдил Байсалов 2025-жылдын 10–21-ноябрында Бразилиянын Белем шаарында өтүп жаткан БУУнун Климаттын өзгөрүшү боюнча Тараптардын 30-конференциясынын (COP30) алкагында дүйнөлүк лидерлердин климаттык саммитине катышууда. Бул тууралуу Өкмөттүн басма сөз кызматынан билдиришти.
Байсалов Кыргызстан 1990-жылдан бери парник газдарынын эмиссиясын кыскартуу боюнча дүйнөлүк лидерлердин катарына кирерин белгилеп, 2030-жылга чейин эмиссияны 18%га, эл аралык колдоо менен 30%га чейин азайтууну, ал эми 2050-жылга көмүртектин нейтралдуулугуна жетүүнү пландап жатканын маалымдады.
Ал ошондой эле "Баку – Белен" жол картасын жогору баалап, тоолуу экосистемаларды адилеттүү климаттык каржылоо менен камсыздоонун маанисин белгиледи.
“Баку – Белен” жол картасында белгиленгендей, тоолуу экосистемалар суу, биологиялык ар түрдүүлүк жана маданий мурас үчүн өтө маанилүү, бирок эң аз каржыланган бойдон калууда. Кыргызстан алардын өзгөчө статусун бекитүүгө жана тоолуу аймактарды адаптациялоо жана туруктуу өнүктүрүү программаларын приоритеттүү каржылоону камсыздоого чакырат", — деп билдирди Эдил Байсалов.
Эдил Байсалов 2027-жылы Бишкекте өтө турган экинчи глобалдык Тоолор саммитине даярдык көрүлүп жатканын да эске салды.
COP30да негизги көңүл Париж келишимин аткарууга, климаттык каржылоону мобилизациялоого жана эмиссияларды кыскартуу боюнча чараларды күчөтүүгө бурулат.
