Садыр Жапаров: Россия – Кыргызстандын бирден бир ири соода-экономикалык өнөктөшү
Президент Садыр Жапаров “Ынтымак Ордодогу” кеңейтилген жыйында Россия Кыргызстандын буга чейин стратегиялык союздашы, ишенимдүү өнөктөшү жана ак ниеттүү досу болуп келгенин жана мындан ары да боло берерин билдирди.
Өлкө башчынын айтымында, ондогон жылдар бою эки эл биримдикти жана бири-бирине болгон туугандык колдоолорду ачык көрсөтүп келе жатат.
“Биз дайыма бир тууган Россия менен болгон бекем, көп тараптуу мамилелерди жогору баалайбыз. Динамикалык геосаясий жана татаал экономикалык кырдаалга карабай Россия жогорку ыңгайлуулукту жана туруктуулукту көрсөтүп келе жатат. Мында биз лидер катары сиздин эмгегиңизди көрүп турабыз. Бул сыпайычылык эмес, а сиздин эл аралык саясаттагы ролуңузду таануу”,-деди өлкө башчы.
Буга улай С.Жапаров Кыргызстан өзүнүн күнүмдүк турмушунда бардык багытттар, айрыкча энергетика жана азык-түлүк багытында колдоону сезип жатканын баса белгиледи. Ошондой эле өлкө башчы Россия Кыргызстандын бирден бир ири соода-экономикалык өнөктөшү болуп каларын, а ЕАЭБ алкагында кооперациялар, инновациялар жана инвестициялар үчүн жаңы горизонттторду ачарын кошумчалады.
Президент С.Жапаров Россия инфраструктуралык, энергетикалык, өнөр жайдык жана гуманитардык демилгелерди колдоп жатканын да айтып өттү. Анын айтымында, 2025-жылы Кыргызстандагы россиялык компаниялар 1800ге жетип, бир нече жыл мурункуга салыштырмалуу 3 эсеге көбөйгөнүн билдирди.
