Кыргызстан менен Грузия соода-экономикалык кызматташууну кеңейтүүнү талкуулашты
Тбилиси шаарында Кыргызстандын Грузиядагы элчиси Максат Мамытканов мамлекеттик органдардын жетекчилери жана бизнес-коомчулуктун өкүлдөрү менен бир катар жолугушууларды өткөрдү. Бул тууралуу Тышкы иштер министрлигинен билдиришти.
Маалыматка ылайык, элчи Грузиянын башкы прокурору Георгий Гваракидзе, юстиция министри Паата Салия жана ички иштер министри Гела Геладзе менен сүйлөшүүлөрдү жүргүздү.
Жолугушуулардын жүрүшүндө эки өлкөнүн ыйгарым укуктуу органдарынын ортосундагы кызматташтыкты чыңдоо, укуктук тармактагы өз ара аракеттенүү, трансулуттук кылмыштуулукка каршы күрөшүү жана тажрыйба алмашуу маселелери талкууланды.
Ошондой эле элчи Грузиянын бизнес-коомчулугунун өкүлдөрү менен жолугуп, соода-экономикалык байланыштарды кеңейтүү жана биргелешкен инвестициялык долбоорлорду ишке ашыруу мүмкүнчүлүктөрүн карады.
