Жогорку Кеңештин депутаттарын мөөнөтүнөн мурда шайлоо башталды
Кыргызстанда Жогорку Кеңештин депутаттарын мөөнөтүнөн мурда шайлоо башталып, саат 08:00дө өлкө аймагы боюнча 2492 шайлоо тилкесинде добуш берүү башталды.
Чет мамлекеттерде жарандардын шайлоо укугун камсыздоо максатында 100 шайлоо тилкеси жана өлкө ичинде 27 аралыктан добуш берүү тилкеси иштерин буга чейин БШК маалымдаган. Алардын ичинде аэропорттордо (учуу жана конуу зоналарында), ири базарларда, соода борборлорунда, тергөө абагында, медициналык мекемелерде жана адамдар көп топтолгон башка жайларда жайгашкан пункттар бар.
БШКнын маалыматы боюнча, шайлоочулардын тизмесине 4 млн 294 миң 243 шайлоочу кирди:
- эркектер – 2 млн 81 миң 514 (48,47%);
- аялдар – 2 млн 212 миң 729 ( 51,52%).
Жашы боюнча бөлгөндө:
- 18 жаштагылар – 104 миң 693 (2,44%):
- 19-35 жаштагылар – 1 млн 707 миң 851 (39,77%)
- 36-45 жаштагылар – 923 миң 975 (21,52%)
- 46-55 жаштагылар – 650 миң 851 (15,16%)
- 56-65 жаштагылар – 528 миң 771 (12,31%)
- 66 жаштан жогоркулар – 378 миң 102 (8,80%).
Борбордук шайлоо комиссиясы шайлоого катышуу үчүн жалпы 460 талапкерди каттаган. Алар өлкө боюнча түзүлгөн 30 көп мандаттуу округдан ат салышып, ар бир округдан үчтөн депутат парламентке шайланып келет. Жогорку Кеңеште 90 депутат болушу керектигин эске алсак, болжол менен бир депутаттык орунган 5,1 талапкер туура келет.
