Мыйзамсыз сыртка чыгарыла турган өрдөк эти, икра Кыргызстанга кайтарылды
“Кордай” ветеринардык постунан Казакстан Айыл чарба министрлигине караштуу Ветеринардык көзөмөл жана байкоо комитетинин аймактык инспекциясы Кыргызстандан Казакстанга мыйзамсыз өрдөк этин алып чыгуу фактысын каттаганы маалым болду.
“Биринчисинде жүк ташуучу автоунаа менен 1000 килограмм өрдөк этин алып өтүүгө аракет кылышты. Текшере келгенде продукциянын маркировкасы жок экени, транспорт каражатынын ветеринардык-санитардык талапка жооп бербестиги жана коштоочу ветеринардык документтердеги маалыматтар туура эмес экендиги аныкталды”, - делет маалыматта.
Натыйжада продукция ээсине кайтарылып, айдоочу административдик жоопкерчиликке тартылган.
Экинчисинде, Кыргызстан жаранынан ветеринардык документтери жок 32 килограмм балкы икрасы табылган. Икра ээсине кайтарылып, мыйзам бузуучу административдик жоопкерчиликке тартылган.
