К.И. Скрябин атындагы КУАУнин студенттери өндүрүштө болуп, дуалдык билим алышты
“Технология жана биоресурстар” факультетинин студенттери Бишкектеги “Sonun Prodimpex” консерва заводунда дуалдык билим алышты. Сабактар “Жемиштерди жана жашылчаларды кайра иштетүү технологиясы” дисциплинасынын алкагында өткөндүгүн аталган окуу жайдан билдиришти.
Маалыматка ылайык, теориялык окутуу кафедрада, ал эми практикалык даярдыктан өтүү заводдун базасында уюштурулду.
Завод заманбап жабдуулар жана аккредитацияланган лаборатория менен камсыздалган. Ишкана тарабынан студенттерге насаатчы, инженер-технолог бекитилип, ал технологиялык процесстерди өздөштүрүүгө көмөк көрсөттү.
Анын жүрүшүндө, студенттер эмгекти коргоо, өндүрүштүк санитария жана тамак-аш коопсуздугу боюнча талаптар менен таанышып, жашылча-жемиштерди кайра иштетүүнүн заманбап технологияларын өздөштүрүштү.
