“Ысык-Көл” экологиялык-экономикалык системасын өнүктүрүү концепциясы бекитилди
Министрлер Кабинети 2030-жылга чейинки мезгилге “Ысык-Көл” экологиялык-экономикалык системасын туруктуу өнүктүрүү концепциясын жана аны ишке ашыруу боюнча чаралар планын бекитти. Тиешелүү токтомго Министрлер Кабинетинин Төрагасы Адылбек Касымалиев кол койгон.
Документтин алкагында 2030-жылга чейин Ысык-Көл экологиялык-экономикалык системасын коргоо жана өнүктүрүү боюнча концепция, чаралар планы жана индикаторлордун матрицасы бекитилди. Концепцияны ишке ашырууда министрликтер, административдик ведомстволор, Улуттук илимдер академиясы, Президенттин Ысык-Көл облусундагы ыйгарым укуктуу өкүлчүлүгү, жергиликтүү мамлекеттик администрациялар, ошондой эле Каракол, Чолпон-Ата жана Балыкчы шаарларынын мэриялары милдеттүү түрдө катышат.
Документтин негизги максаты – Ысык-Көлдү жана анын биосфералык аймагын антропогендик, техногендик жана жаратылыш факторлорунун терс таасирлеринен коргоо, жаратылыш системасын сактоо менен бирге региондун туруктуу экономикалык өсүшүн камсыз кылуу. Ошондой эле концепция калктын жашоо сапатын жогорулатууга багытталган.
Маалыматтын толук версиясы тиешелүү мамлекеттик порталга жайгаштырылып, кызыккан тараптар белгиленген шилтеме аркылуу тааныша алышат.
