ТИМ кыргызстандыктарды Иранга баруудан убактылуу оолак болууну сунуштайт
КРнын Тышкы иштер министрлиги кыргыз жарандарын шашылыш же зарыл болбосо, Иранга баруудан алыс болууга чакырат. Бул тууралуу министрликтин басма сөз кызматынан кабарлашты.
Билдирүүдө акыркы күндөрү Иран Ислам Республикасынын бир нече шаарларында уруксатсыз нааразычылык акциялары катталганы белгиленет. 2026-жылдын 6-январына карата Ирандын Тышкы иштер министрлигинин расмий маалыматына ылайык, Ирандагы нааразычылык акцияларында жабыркагандардын арасында кыргыз жарандары жок.
Ирандагы Кыргыз Республикасынын жарандарына ведомство төмөнкүлөрдү сунуштайт:
- өзгөчө сак жана этият болуу;
- эл көп топтолгон жерлерден, нааразылык акцияларынан алыс болуу;
- жергиликтүү бийлик органдарынын талаптарын жана сунуштарын так аткаруу;
- жарандык документтерин жана КРнын элчилигинин байланыш маалыматын алып жүрүү;
- жергиликтүү бийлик органдарынын жана дипломатиялык миссиялардын расмий билдирүүлөрүн көзөмөлдөө.
Тышкы иштер министрлиги кырдаалды кылдаттык менен көзөмөлдөп турат жана зарыл учурда жарандарга ар кандай өзгөрүүлөр тууралуу тезинен кабарлайт. Өзгөчө кырдаалдар болгон учурда, КРнын жарандарына Тегерандагы КРнын элчилигине дароо кайрылуу сунушталат.
Ишеним телефонунун номерлери: +989352505226, +989352505229.
