Өкмөт аймактарды бюрократиядан арылтуу реформасынын жаңы этабын баштады
Министрлер Кабинетинин Төрагасы Адылбек Касымалиев мамлекеттик башкаруу системасынын натыйжалуулугун жогорулатуу жана бюрократиядан арылтуу маселеси боюнча жыйын өткөрдү. Бул тууралуу Өкмөттүн басма сөз кызматынан билдиришти.
Жыйында бюрократиядан арылтуу иштеринин экинчи этабы аймактык деңгээлде ишке ашырыла баштаганы белгиленди. Анын алкагында жергиликтүү бийлик органдарынын ишин оптималдаштыруу, ашыкча жол-жоболорду кыскартуу, чечим кабыл алуу мөөнөттөрүн тездетүү жана бизнес үчүн шарттарды жакшыртуу максаты коюлду.
Адылбек Касымалиев ар бир аким жана жергиликтүү жетекчи өзүнө жүктөлгөн милдеттерди сапаттуу аткарууга жеке жоопкерчилик тартаарын белгилеп, аймактарда бюрократиялык тоскоолдуктарды жоюу, уруксат берүүчү документтерди алуудагы мөөнөттөрдү кыскартуу жана “Бирдиктүү терезе” принцибин толук кандуу иштетүү тапшырмасын берди.
Ошондой эле санариптештирүү бюрократиядан арылуунун негизги куралы катары белгиленип, пилоттук долбоор Токмок жана Нарын шаарларында, Ноокат, Баткен жана Түп райондорунда, ошондой эле Жалал-Абад жана Талас облустарында ишке ашырыла турганы маалымдалды.
Жыйындын жыйынтыгында мамлекеттик органдарга жана жергиликтүү бийлик өкүлдөрүнө тиешелүү тапшырмалар берилди.
