Япониялык ишкерлер Кыргызстандан сурьма жана кремний сатып алууга кызыкдар
Япон компаниялары Кыргызстанда өндүрүлгөн сурьма менен кремнийди сатып алууга кызыкдар экенин билдиришти. Бул маселе Жогорку Кеңештин Төрагасы Марлен Маматалиевдин Японияга расмий сапарынын алкагында ири компаниялардын өкүлдөрү менен жолугушууда талкууланган.
Жогорку Кеңештин басма сөз кызматынын маалыматына ылайык, төрага менен жолугушууга Кейданрен бизнес федерациясынын Борбордук Азия жана Кавказ өлкөлөрү менен экономикалык кызматташтык боюнча комитетинин жетекчилери баштаган ишкерлер катышкан. Алар тоо-кен тармагындагы кызматташтыкты кеңейтүү маселелерин карап, JKII компаниясы менен кыргыз тараптын ортосундагы меморандумга кол коюу жараянын тездетүүнү талкуулашты.
Мындан тышкары, Кыргызстанда Toyota компаниясынын расмий борборун ачуу, энергетика, сейрек кездешүүчү металлдарды кайра иштетүү жана агроөнөр жай тармактарына инвестиция тартуу маселелери көтөрүлдү.
Марлен Маматалиев жапон компанияларын Кытай–Кыргызстан–Өзбекстан темир жолунун мүмкүнчүлүктөрүн пайдаланууга, Кыргызстанда логистикалык борборлорду, кургак портторду жана заманбап терминалдарды курууга катышууга чакырды.
Жолугушууда эки өлкөнүн ортосундагы инвестициялык кызматташтыкты кеңейтүү жана буга чейин жетишилген келишимдерди конкреттүү долбоорлорго айландыруу зарылдыгы белгиленди.
