Мэриянын кызматкери 1 млн сом пара алуу шеги менен кармалды
Бишкек шаардык мэриясынын Транспорт жана жол-транспорттук инфраструктураны өнүктүрүү департаментинин алдындагы "Бишкек шаардык транспорту" муниципалдык ишканасынын кызматкери кармалды.
УКМКнын маалыматына ылайык, А.К.Ш. аттуу кызматкер 1 миллион сом өлчөмүндөгү параны алып жаткан учурда кармалган.
УКМК белгилегендей, муниципалдык ишкананын мамлекеттик сатып алуулар бөлүмүнүн айрым кызматкерлери тендердин жалпы суммасынан 10% өлчөмүндө акча талап кылып, жасалма тоскоолдуктарды жаратуу жана аткарылган иштер үчүн каражаттарды которуу процессин атайылап создуктуруу менен алектенип келишкен.
Учурда муниципалдык кызматкерлердин аракеттерине юридикалык баа берүү, ошондой эле бул ишке тиешеси бар башка адамдарды аныктоо боюнча тиешелүү иш-чаралар жүргүзүлүүдө.
