Адылбек Касымалиев: Коомдук коопсуздук –экономикалык өсүштүн негизи
Министрлер Кабинетинин Төрагасы Адылбек Касымалиев Ички иштер министрлигинин 2025-жылдагы ишмердүүлүгүнүн жыйынтыгына арналган коллегияга катышты. Бул тууралуу Өкмөттүн басма сөз кызматынан билдиришти.
Коллегияда ички иштер министри Улан Ниязбеков кылмыштуулук менен күрөшүүнүн жыйынтыктары, милициянын ишине санариптик технологияларды киргизүү жана жарандардын коопсуздугун камсыз кылуу боюнча маалымат берди.
Адылбек Касымалиев Ички иштер министрлигинин өздүк курамына эл аралык жогорку деңгээлдеги иш-чаралар учурунда коопсуздукту камсыз кылганы үчүн ыраазычылык билдирип, ИИМ калк менен түз иштеген маанилүү мамлекеттик орган экенин белгиледи.
Ал коомдук тынчтык жана туруктуулук экономикалык өнүгүүнүн негизги шарты экенин айтып, коопсуздук болбосо улуттук экономиканы өнүктүрүү мүмкүн эместигин баса белгиледи.
Ошондой эле 2025-жылы өлкөнүн консолидацияланган бюджети 1 триллион сомдон ашып, 2020-жылга салыштырмалуу дээрлик беш эсеге өскөнүн белгиледи. Бул динамикалык экономикалык өсүштүн жыйынтыгы экени айтылды.
Иш-чаранын соңунда кызматтык милдеттерин мыкты аткарган ИИМ кызматкерлерине Министрлер Кабинетинин Ардак грамоталары жана ыраазычылыктары тапшырылды.
