Таласта ири коррупцияга шектелип, аким баштаган бир катар жетекчилер кармалды
Талас облусунда бир катар кызмат адамдары коррупцияга шектелип кармалды. Бул тууралуу Улуттук коопсуздук боюнча мамлекеттик комитеттен (УКМК) билдиришти.
Маалыматка ылайык, Бакай-Ата районунун акими А.Б.М., Токой кызматынын Талас токой чарбасынын директору А.Н.Ж. жана башка кызмат адамдары тарабынан мыйзам талаптарын системалуу түрдө одоно бузуу фактылары аныкталган.
Тергөөнүн жүрүшүндө 2022-2023-жылдары Талас шаарынын кире беришиндеги мамлекеттик токой фондуна таандык жер тилкелери эс алуу жайларын куруу үчүн мыйзамсыз бөлүштүрүлгөнү белгилүү болгон. Аталган жерлер 4 жаранга экспертизасыз, каттоосуз жана токой чыгымдары төлөнбөстөн берилген. Натыйжада мамлекетке 23 млн сомдон ашык зыян келтирилген.
Мындан тышкары, 2024-жылы Бакай-Ата районунун акими мурдагы депутат жана айыл өкмөт башчысы менен сүйлөшүп, 475 теректи мыйзамсыз кыюуга уруксат берген. Анын кесепетинен мамлекетке 5,3 млн сом зыян келтирилген.
Аталган фактылар боюнча Кылмыш-жаза кодексинин "Кызмат абалынан кыянаттык менен пайдалануу" беренеси менен кылмыш иши козголуп, А.Б.М. жана А.Н.Ж. убактылуу кармоочу жайга камакка алынды.
