2025-жылы экономиканын өсүү темпи жогорку деңгээлде сакталып, акыркы эки жылда 11%дан ашты

Кыргыз Республикасынын ИДП өсүү темпи боюнча аймактык жана дүйнөлүк масштабда абдан жогорку көрсөткүчкө ээ. Бул тууралуу КРнын Министрлер Кабинетинин Төрагасы –Адылбек Касымалиев Президенттин Администрациясынын аппараттык кеңешмесинде билдирди.

Өкмөттүн басма сөз кызматынан маалымдагандай, иш чаранын жүрүшүндө министрлер кабинетинин башчысы 2025-жылдын алдын ала жыйынтыктарын чыгарды.

“2025-жылы экономиканын өсүү темпи жогорку деңгээлде сакталып, акыркы эки жылда (2024–2025-жылдары) 11%дан ашты. Бул жүргүзүлүп жаткан экономикалык саясаттын натыйжалуулугун жана өнүгүүнүн туура багытта кетип жаткандыгын көрсөтөт. 2025-жылдын жыйынтыгы боюнча ИДПнын көлөмү 1 трлн 976,4 млрд сомду түздү, башкача айтканда, дээрлик 2 трлн сомго жетти жана жылдын аягына карата такталган эсептөөлөр боюнча 2 трлн сомдон ашат деп күтүлүүдө”, - деди ал.

Салыштыруу үчүн, 2022-жылы ИДПнын көлөмү 1 трлн 21 млрд сомду түзүп, үч жылдын ичинде ИДПнын көлөмү эки эсеге өскөндүгү айтылды. 2025-жылы ИДПнын реалдуу өсүү темпи 11,1 %ды түздү. Адылбек Касымалиев белгилегендей, экономиканын өсүшүнө экономиканын бардык тармактары салым кошту:

·       курулуш сектору 21,1 %га,

·       тейлөө сектору – 10,9 %га,

·       айыл чарбасы — 2,2 %га өстү,

·       өнөр жайда өсүү 10,7 %ды түздү,  

·       тамак-аш азыктарын өндүрүүдө – 30,1%,

·       курулуш материалдарын өндүрүүдө – 35,7%,

·       химиялык продукцияны өндүрүүдө – 19,8%,

·       кен казып алууда – 14,2% катталды. Бул абдан позитивдүү тенденция болуп саналат.

“Негизги капиталга инвестициялардын көлөмү 18,4%га көбөйүп, 374,6 млрд сомду түздү, бул рекорддук көрсөткүч болуп калды жана 2024-жылга салыштырмалуу 100 млрд сомго көп. Негизги капиталга салынган инвестициялардын 24% же 90,3 млрд сому республикалык бюджеттин эсебинен каржыланды, бул 2024-жылга салыштырмалуу 42,7%га көп”, – деди МинКаб башчысы.