Калктын ишеним индекси 46,2 баллга жетип, тарыхый рекорд койду
Министрлер Кабинетинин Төрагасы Адылбек Касымалиев Президенттин Администрациясынын кезектеги аппараттык кеңешмесинде 2025-жылдын экинчи жарым жылдыгы үчүн “Калктын ишеним индекси” изилдөөсүнүн жыйынтыгын тааныштырды. Бул тууралуу Өкмөттүн басма сөз кызматынан билдиришти.
Ал бул мониторинг Улуттук статистика комитети тарабынан ар бир жарым жылда жүргүзүлөрүн белгиледи. Изилдөө өлкөнүн жети облусун, Бишкек жана Ош шаарларын камтып, коомдук маанайдын өзгөрүшүн жана жарандардын мамлекеттик органдарга болгон ишеним деңгээлин объективдүү баалоого мүмкүнчүлүк берет.
Адылбек Касымалиевдин айтымында, 2025-жылдын экинчи жарым жылдыгынын жыйынтыгы боюнча ишеним индекси 46,2 баллга жетип, тарыхый рекорд койду. Бул көрсөткүч 2024-жылга салыштырмалуу 18% жогору.
Анын белгилешинче, индекстин өсүшү Президент Садыр Жапаров жүргүзүп жаткан саясий курска жана анын командасынын ишмердүүлүгүнө калктын жогорку ишенимин тастыктайт. Ошондой эле акыркы жылдары ишке ашырылып жаткан социалдык-экономикалык реформалар мамлекеттик органдардын ишинин сапатын жогорулатууга багытталганын көрсөтүүдө.
Аппараттык кеңешменин жыйынтыгында А.Касымалиев мамлекеттик органдардын жана Президенттин Администрациясынын түзүмдүк бөлүмдөрүнүн жетекчилерине иштин темпин басаңдатпоону, экономикалык өсүштү колдоону жана жарандарды түйшөлткөн маселелерди ыкчам чечүүнү тапшырды.
