Мектептерде окуучуларды которуу онлайн тартипте жүргүзүлөт
Министрлер Кабинетинин Төрагасы Адылбек Касымалиевдин төрагалыгы алдында өткөн аппараттык кеңешмеде билим берүү жана туризм тармактарына санариптик механизмдерди киргизүү маселелери каралды. Бул тууралуу Өкмөттүн басма сөз кызматынан билдиришти.
Кеңешмеде окуучуларды мектептер ортосунда которуунун электрондук системасын киргизүү сунушталды. Учурда өлкөдө 2170 мамлекеттик жана муниципалдык мектепте 1,5 миллиондон ашык окуучу билим алат, ал эми которуу процесси кол жазма режиминде жүргүзүлүп келет.
Адылбек Касымалиев электрондук система класстардагы бош орундарды автоматтык көрсөтүп, процессти ата-энелер үчүн ачык жана түшүнүктүү кылышы керектигин белгиледи. Билим берүү министрлигине бул системаны кыска мөөнөттө иштеп чыгып, ишке киргизүү тапшырылды.
Ошондой эле кеңешмеде бирдиктүү санариптик туристтик платформаны түзүү маселеси каралды. Платформа туристтер үчүн кызматтарды бир терезе принциби менен көрсөтүүгө багытталат.
Жыйынтыгында тиешелүү мамлекеттик органдарга "Түндүк" ААКсы менен биргеликте туристтик платформаны түзүүнү камсыз кылуу тапшырылды.
