Жогорку Кеңеш эмгек жана социалдык камсыздоо мыйзамдарын жактырды
Жогорку Кеңештин тиешелүү комитети "Кыргыз Республикасынын эмгек, социалдык камсыздоо чөйрөсүндөгү айрым мыйзам актыларына өзгөртүүлөрдү киргизүү жана айрым мыйзам актыларын күчүн жоготту деп таануу жөнүндө" мыйзам долбоорун биринчи окууда жактырды. Бул тууралуу Жогорку Кеңештин басма сөз кызматынан билдиришти.
Мыйзам долбоорунун демилгечиси – Министрлер Кабинети. Жыйында эмгек, социалдык камсыздоо жана миграция министринин биринчи орун басары Камчыбек Досматов мыйзам долбоору эмгек жана социалдык камсыздоо чөйрөсүндөгү айрым мыйзам актыларына өзгөртүүлөрдү киргизүүгө, ошондой эле "Эмгек акыны жана башка социалдык төлөмдөрдү өз убагында төлөп берүүнү камсыз кылуу жөнүндө" мыйзамды жана башка мыйзам актыларын актуалдуу эместигине байланыштуу күчүн жоготту деп табууга багытталганын баса белгиледи.
Депутаттар алыскы жана тоолуу аймактарда социалдык төлөмдөрдүн кечиктирилгендиги жана көп балалуу энелерди колдоо маселелерин көтөрүштү.
Комитет ошондой эле "Милдеттүү мамлекеттик социалдык камсыздандыруу максатында Кыргыз Республикасынын жарандарын жекече эсепке алуу жөнүндө2 мыйзамына өзгөртүүлөрдү экинчи окууда жактырды. Мыйзам долбоору жеке идентификациялык номерлерди ыйгарууну жөнгө салууга багытталган.
