Сот аткаруучулар "СААБ Строй" ЖЧКсынан 4 млн 230 миң 477 сом өндүрдү
Сот аткаруучулар кызматы "СААБ Строй" ЖЧКсы компаниясынан 4 млн 230 миң 477 сом өлчөмүндөгү салык карызын өндүрүп, каражатты Салык кызматынын пайдасына өткөрдү.
Ведомствонун маалыматына ылайык, аталган кызматтын Аламүдүн райондук бөлүмү аткаруу өндүрүшүнүн алкагында көрсөтүлгөн сумманы толук өндүрүүнү камсыз кылган.
Белгиленгендей, аткаруу өндүрүшү Аламүдүн райондук сотунун чечиминин негизинде козголгон. Карыз тарапка соттун чечимин ыктыярдуу аткаруу сунушталып, аткарылбаган учурда мыйзамда каралган чаралар көрүлөрү эскертилген.
Юстиция министрлигинин маалыматына ылайык, компаниянын жетекчиси — Замирбек Султонов, ал эми негиздөөчүсү — Илимбек Бакиров.
Компания турак жай жана турак эмес имараттарды куруу менен алектенет, 2020-жылы юстиция органдарында катталган. Компания 2019-жылдын жыйынтыгы боюнча салык төлөө боюнча ири карызкорлордун тизмесине кирген.
