Түркстан шаарында өткөн жыйында соода-экономикалык, инвестициялык демилгелерди илгерилетүүгө көңүл бурулду
Президент Садыр Жапаровдун Түрк мамлекеттер уюмуна мүчө-мамлекеттердин башчыларынын Түркстан шаарында өткөн бейформал саммитине катышты.
Мамлекет башчысы С.Жапаров саммиттин алкагында Өзбекстандын Президенти Шавкат Мирзиёев менен сүйлөшүүлөрдү жүргүздү.
Тараптар соода-экономикалык, инвестициялык, транспорттук-логистикалык, энергетикалык жана маданий-гуманитардык тармактарда биргелешкен демилгелерди илгерилетүүгө өзгөчө көңүл бурушту.
Президент андан соң "Түрк цивилизациясынын борборунун” пайдубалына мезгил кутусун салуу аземине катышты.
Азем Азербайжан, Казакстан, Түркия жана Өзбекстандын лидерлеринин катышуусунда видеоконференция режиминде өттү.
"Түрк цивилизациясынын борбору" долбоору түрк элдеринин тарыхый-маданий мурастарын сактоого, изилдөөгө жана жайылтууга багытталган. Борбор түрк дүйнөсүнүн руханий борборлорунун бири болуп эсептелген Түркстан шаарында курулат.
Президенттерге ошондой эле жасалма интеллект экономикасын өнүктүрүү жана Уюмга мүчө өлкөлөрдүн санариптик өз ара аракеттенүү стратегиясы сунушталды.
Казакстан тарап санариптик инфраструктура, жасалма интеллект, спутник байланышы жана эсептөө кубаттуулугун өнүктүрүү чөйрөлөрүндө ишке ашырылып жаткан демилгелер тууралуу маалымат берди. Мамлекеттик башкаруу системасына санариптик чечимдерди киргизүү ыкмалары да көрсөтүлдү.
ТМУнун бейформал саммитинде сөз сүйлөгөн Президент Садыр Жапаров саммиттин жасалма интеллектке жана санариптик өнүгүүгө арналган темасы дүйнөлүк заман талабындагы тенденцияларды түздөн-түз чагылдырарын, анткени технологиялар экономикалык өсүштүн жана глобалдык атаандаштыктын негизги фактору болуп калганын баса белгиледи.
