Садыр Жапаров Маврикийдин президенти менен жолукту
Президент Садыр Жапаров 18-майда, Баку шаарында өтүп жаткан Дүйнөлүк шаарлар форумунун 13-сессиясынын алкагында Маврикий Республикасынын Президенти Дхарамбир Гокхул менен жолугушуу өткөрдү.Бул тууралуу президенттин расмий сайтына жарыяланды.
Маалыматка таянсак, жолугушуунун жүрүшүндө тараптар эки жактуу кызматташтык маселелерин, ошондой эле өз ара кызыкчылык туудурган бардык багыттар боюнча, анын ичинде санариптештирүү жана каржы сектору чөйрөлөрүндө өз ара аракеттенүүнү мындан ары кеңейтүү келечегин талкуулашты.
Мамлекет башчысы Кыргызстандын Африка өлкөлөрү менен, анын ичинде Маврикий менен эки тараптуу жана көп жактуу форматта кызматташууну өнүктүрүүгө кызыкдар экенин баса белгиледи.
Бул контекстте Президент Садыр Жапаров көп тараптуу кызматташууну алдыга жылдыруу максатында үстүбүздөгү жылдын февраль айында Кыргызстан Африка бирлигинде байкоочу макамын алганын айтты.
Өз кезегинде Маврикийдин Президенти Дхарамбир Гокхул эки тараптуу өз ара аракеттенүүнү кеңейтүүгө даяр экенин билдирди. Ал эл аралык аренада чакан мамлекеттердин ортосундагы өз ара колдоо негизги маселелерди натыйжалуу чечүү үчүн өзгөчө маанилүү экенин баса белгиледи.
