Кальян жайларын мыйзамдаштыруу демилгеси кошумча талкууга жөнөтүлдү
11-июнда Жогорку Кеңештин жыйынында кальян жайларынын ишин лицензиялоого багытталган мыйзам долбоору биринчи окууда каралды. Бул тууралуу өкмөттүн басма сөз кызматы билдирди.
Министрлер кабинети тарабынан демилгеленген мыйзам долбоору кальян кызматын көрсөтүү тармагын мыйзамдаштырууга, лицензиялык тартип киргизүүгө, ошондой эле санитардык-гигиеналык, өрт коопсуздугу жана башка милдеттүү талаптардын сакталышын камсыздоого багытталган.
Талкуу учурунда бир катар депутаттар кальян жана никотин камтыган өндүрүмдөрдүн калктын, өзгөчө жаштардын ден соолугуна тийгизген терс таасирине көңүл бурушту. Ушундан улам айрым эл өкүлдөрү бул демилгеге каршы пикирин билдиришти.
Ошол эле учурда айрым депутаттар лицензиялоо аркылуу мыйзамсыз иштеп жаткан жайларды көзөмөлгө алуу жана алардын ишмердүүлүгүн жөнгө салуу мүмкүн болорун белгилешти.
Жыйынтыгында мыйзам долбоорун кеңири талкуулоо зарылдыгы айтылып, документ күн тартибинен алынды.
Мыйзам долбоору боюнча талкуулар улантылары күтүлүүдө.
