Ошто 650 миң сом пара берип жаткан жаран кармалды
Ош шаарында баңгизатка байланыштуу кылмыш ишинин жагдайларын өзүнүн пайдасына чечип берүү үчүн милиция кызматкерлерине 650 миң сом пара берип жаткан жаран кармалды. Бул тууралуу Ички иштер министрлигинен кабарлашты.
Маалыматка караганда, ИИМдин Баңгизаттарды мыйзамсыз жүгүртүүгө каршы күрөшүү кызматы тарабынан жүргүзүлгөн ыкчам-иликтөө иш-чараларынын жүрүшүндө 1983-жылы туулган А.Д. аттуу жаран аныкталып, Тергөө кызматына жеткирилген.
Тергөө учурунда шектүү кылмыш ишин өзүнүн пайдасына чечип берүү үчүн милиция кызматкерлерине 8 миң АКШ долларын пара катары берүүнү сунуштаган. Кийин ал Ош шаарындагы милициянын имаратында кызматкерлерге 650 миң сом берип жаткан жеринен кармалган.
Аталган операция ИИМдин Ички иликтөө кызматы, Баңгизаттарды мыйзамсыз жүгүртүүгө каршы күрөшүү кызматы жана Ош шаардык ички иштер башкармалыгынын Тергөө кызматы тарабынан биргеликте жүргүзүлгөн.
Учурда факты боюнча тергөө амалдары жүрүп, окуянын бардык жагдайлары аныкталууда.
