Төрага АКШ элчисине визалык шарттарды жеңилдетүү өтүнүчүн билдирди
Жогорку Кеңештин төрагасы Марлен Маматалиев АКШнын Кыргызстандагы элчиси Лесли Вигерини кабыл алып, эки өлкө ортосундагы кызматташтыкты кеңейтүү маселелерин талкуулады.
Парламенттин басма сөз кызматы маалымдагандай, жолугушууда парламенттер аралык байланыштарды өнүктүрүү, эки тараптуу диалогду жандандыруу боюнча пикир алмашуу болду.
Төрага Марлен Маматалиев Кыргызстан АКШ менен бардык багыттарда кызматташтыкты бекемдөөгө кызыкдар экенин белгилеп, парламенттик дипломатиянын маанилүү ролуна токтолду. Ал ошондой эле АКШнын көз карандысыздыгынын 250 жылдыгы менен элчини куттуктады.
Жолугушууда кыргызстандыктар үчүн виза маселеси да көтөрүлдү. Маматалиев визалык шарттардын катаалдашы жана күрөөнүн киргизилиши боюнча тынчсыздануусун билдирип, бул маселени кароого көмөктөшүүнү өтүндү.
Өз кезегинде элчи Лесли Вигери АКШ Кыргызстан менен кызматташууга өзгөчө маани берерин белгилеп, виза талаптары коопсуздук жана мыйзам бузууларды алдын алуу максатын көздөөрүн түшүндүрдү.
АКШ тараптын маалыматына ылайык, айрым өлкөлөрдүн, анын ичинде Кыргызстандын жарандары үчүн B-1/B-2 визасынын мөөнөтү кыскарып, айрым учурларда виза күрөөсү киргизилүүдө.
Кыргызстандын Тышкы иштер министрлиги бул маселе боюнча АКШ менен сүйлөшүүлөр жүрүп жатканын билдирип келет.
