Комитетте геопарктарды түзүү боюнча мыйзам долбоору колдоо тапты
22-июнда Агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитеттин кезектеги жыйынында бир катар мыйзам долбоорлору биринчи окууда каралып, колдоо тапты.
Жогорку Кеңештин басма сөз кызматы маалымдагандай, жыйындын жүрүшүндө депутаттар Камила Талиева жана Марлен Маматалиев демилгелеген “Өзгөчө корголуучу жаратылыш аймактары жөнүндө” мыйзамга киргизилип жаткан өзгөртүүлөр талкууланды.
Демилгечилердин айтымында, мыйзам долбоору геопарктардын улуттук тармагын түзүүгө, уникалдуу геологиялык объектилерди сактоого жана туруктуу туризм аркылуу аймактарды өнүктүрүүгө багытталган.
Эл өкүлү Камила Талиева геопарктардын коом үчүн маданий жана социалдык мааниси чоң экенин белгилеп, экологиялык аң-сезимди жогорулатуу жана жаратылыш мурастарын сактоо зарылдыгын белгиледи.
Талкууда депутат Махабат Мавлянова демилгени колдоп, өлкөнүн 94%ын тоолор түзөрүн, геопарктарды өнүктүрүү жергиликтүү калктын кирешесин жогорулатууга өбөлгө болорун айтты. Ошондой эле экологиялык жана санитардык талаптарды сактоонун маанилүүлүгүнө токтолду.
Депутат Алишер Козуев туристтердин санын көбөйтүү жана маалыматтык саясатты күчөтүү зарылдыгын белгилеп, жерлерди трансформациялоо маселеси боюнча тактоочу суроолорду узатты. Өз кезегинде Министрлер кабинетинин өкүлү бул багытта мыйзам чегинде бардык маселелер чечилерин билдирди.
Ошондой эле жыйында депутаттар Камила Талиева, Марлен Маматалиев жана Болот Борбиев тарабынан демилгеленген “Кыргыз Республикасындагы геологиялык парктар жөнүндө” мыйзам долбоору да каралып, биринчи окууда жактырылды.
