Кыргызстан менен АКШ аба каттамдарын көбөйтүү жолдорун талкуулашты
Жарандык авиация мамлекеттик агенттигинин директору Данияр Бостонов АКШнын Кыргызстандагы элчиси Лесли Вигери менен жолугушуп, авиация тармагындагы кызматташтык маселелерин талкуулады.
Мекеменин маалыматына ылайык, жолугушууда тараптар өнөктөштүк мамилелерди бекемдөөгө жана өз ара кызыкчылык жараткан багыттар боюнча кызматташууну кеңейтүүгө даяр экенин ырасташты.
Сүйлөшүүлөрдүн негизги темаларынын бири Кыргызстан менен АКШнын ортосундагы “Ачык асман” жөнүндө макулдашуунун долбоору болду. Тараптар эки өлкөнүн ортосундагы аба каттамдарын өнүктүрүү мүмкүнчүлүктөрүн жана авиация тармагындагы кызматташтыкты тереңдетүү боюнча мындан аркы кадамдарды талкуулашты.
Мындан тышкары, Boeing компаниясы менен кызматташуу маселелери каралып, Кыргызстандын жарандык авиациясын өнүктүрүү боюнча келечектүү багыттар сөз болду.
Ошондой эле жолугушууда АКШнын "Transportation Security Administration" кызматы жүргүзө турган аудитке даярдык көрүү жана жүк ташуучу авиакомпаниялардын каттамдарын уюштуруу мүмкүнчүлүктөрү талкууланды.
