Пекинде кыргыз-кытай парламенттик кызматташтыгы талкууланды
22-июнда Жогорку Кеңештин депутаттары Улан Примов, Болотбек Борбиев, Исманали Жороев, Алтынбек Кылычбаев жана Жайлообай Нышанов Пекин шаарында өткөн семинарга катышты. Бул тууралуу парламенттин басма сөз кызматы билдирди.
Иш-чара "Кытай – Борбор Азия рухун өнүктүрүүдөгү мыйзам чыгаруу бийлигинин ролу" деген темада уюштурулуп, ага Борбор Азия өлкөлөрүнүн парламенттери катышкан.
Семинардын жүрүшүндө парламенттер аралык кызматташтыкты бекемдөө, саясий, соода-экономикалык жана маданий-гуманитардык байланыштарды кеңейтүү маселелери талкууланды.
Сапардын алкагында кыргызстандык депутаттар Бүткүл Кытай Эл өкүлдөр жыйынынын Туруктуу комитетинин төрагасынын орун басары Шохрат Закир менен жолугушту.
Жолугушуунун жыйынтыгында тараптар Кыргызстандын жана Кытайдын мыйзам чыгаруу бийлигинин ортосундагы кызматташтыкты мындан ары кеңейтүүгө кызыкдар экенин билдиришти.
