Кыргызстанда президенттик шайлоо 27-январда өтүшү мүмкүн
Кыргызстанда кезектеги президенттик шайлоо 27-январда өтүшү мүмкүн. Бул тууралуу 24-июнда Жогорку Кеңештин төрагасы Марлен Маматалиев парламенттин жыйынында билдирди.
Анын айтымында, депутаттар кабыл алган мыйзам долбооруна ылайык, президенттик шайлоону өткөрүү күнү боюнча жобо өзгөртүлдү. Буга чейин шайлоо январдын акыркы жекшембисине белгиленсе, эми акыркы шаршембисинде өткөрүлөт.
Маматалиев мындай өзгөртүү элдин шайлоого катышуусун камсыздоо максатында сунушталганын белгиледи. Анын айтымында, буга чейинки шайлоолордо жарандардын катышуусу төмөн болуп келген.
Төрага президент жаңы мыйзамга кол коюп, ага жараша шайлоо өтүүчү күндү белгилөөсү керектигин кошумчалады.
Белгилей кетсек, Жогорку Кеңеш 24-июнда "Кыргыз Республикасынын Президентин жана Жогорку Кеңештин депутаттарын шайлоо жөнүндө" конституциялык мыйзамга өзгөртүүлөрдү киргизүү тууралуу мыйзам долбоорун экинчи жана үчүнчү окууда кабыл алды.
Азыркы президент Садыр Жапаров 2021-жылы январда мамлекет башчысы болуп шайланган. Кийинчерээк кабыл алынган жаңы Конституцияга ылайык, бул биринчи президенттик мөөнөт катары эсептелет. Ошондой эле 5 жылдык дагы бир мөөнөткө гана шайланууга укугу бар.
Буга байланыштуу жаралган талкуулардан кийин Конституциялык сот 2027-жылы президенттик шайлоо өткөрүлөрүн жана ошол учурда президенттин биринчи мөөнөтү аяктай турганын белгилеген чечим чыгарган.
