Адылбек Касымалиев Венгриянын Кыргызстандагы элчисин кабыл алды
25-июнда Министрлер Кабинетинин төрагасы Адылбек Касымалиев Венгриянын Кыргызстандагы атайын жана толук ыйгарымдуу элчиси Шандор Дорогини “Ынтымак Ордо” резиденциясында кабыл алды.
Жолугушууда тараптар эки өлкө ортосундагы кызматташтыктын учурдагы абалын жана келечектеги багыттарын талкуулашып, соода-экономикалык байланыштардын өсүшүн белгилешти.
Ошондой эле маданий-гуманитардык кызматташтыкка көңүл бурулуп, “Stipendium Hungaricum” билим берүү программасынын алкагында кыргызстандык студенттер үчүн жыл сайын бөлүнүп жаткан 200 орун жогору бааланды.
Адылбек Касымалиев Шандор Дорогиге жемиштүү иши үчүн ыраазычылык билдирип, эки тараптуу кызматташтыкты жандандырууга кошкон жеке салымын белгилеп, Кыргыз Республикасынын Министрлер кабинетинин Ардак грамотасы менен сыйлады.
Өз кезегинде Венгриянын элчиси өлкө жетекчилигине Бишкектеги дипломатиялык ишмердүүлүгү учурунда көрсөткөн ар тараптуу жардамы үчүн ыраазычылык билдирди.
