Кыргызстан менен Кытай биргелешкен долбоорлорду талкуулашты
Министрлер Кабинетинин төрагасынын орун басары Эрлист Акунбеков Кытайдын Синьцзян-Уйгур автономдуу районуна болгон иш сапарында Кытайдын Мамлекеттик кеңешинин вице-премьери Дин Сюэсян менен жолугушту. Бул тууралуу өкмөттүн басма сөз кызматы билдирди.
Жолугушууда тараптар эки өлкөнүн лидерлери жетишкен макулдашууларды ишке ашыруу жана саясий, соода-экономикалык, маданий-гуманитардык тармактардагы кызматташууну мындан ары кеңейтүү маселелерин талкуулашты.
Суу ресурстары, айыл чарба жана кайра иштетүү өнөр жайы министри Эрлист Акунбеков Кытайга Министрлер кабинетинин төрагасынын орун басары катары алгачкы жумуш сапары менен келгенин белгилеп, Кыргызстан менен Кытайдын ортосундагы мамилелер жаңы сапаттык деңгээлге көтөрүлүп, ар тараптуу өнөктөштүк бекемделип жатканын айтты.
Анын айтымында, Кыргызстандын президенти Садыр Жапаров менен Кытайдын төрагасы Си Цзиньпин ортосундагы ишенимдүү мамиле эки мамлекеттин кызматташтыгын өнүктүрүүгө өбөлгө түзүүдө.
Жолугушууда ошондой эле эки өлкө үчүн маанилүү болгон ири инфраструктуралык долбоорлорго өзгөчө көңүл бурулду. Алардын катарында Кыргызстан–Кытай–Өзбекстан темир жолу, кыргыз-кытай мамлекеттик чек арасындагы "Бедел" өткөрмө бекетинин ачылышы жана "Барскоон – Бедел – Учтурфан – Аксу" автожолунун курулушу бар.
Өз кезегинде Дин Сюэсян кытай тарап Кыргызстан менен биргелешкен бардык долбоорлорду колдоого даяр экенин билдирип, Синьцзян-Уйгур автономдуу району аркылуу эки өлкөнүн ортосундагы соода жүгүртүүнүн өсүшүн камсыздоо жана чек ара өткөрүү бекеттеринин үзгүлтүксүз иштешин колдоо боюнча бардык зарыл чаралар көрүлөрүн белгиледи.
Тараптар жолугушуунун жүрүшүндө каралган демилгелерди жакын арада өтө турган кыргыз-кытай өкмөттөр аралык соода-экономикалык кызматташтык комиссиясынын жыйынында жана Кыргызстанда уюштурула турган Шанхай кызматташтык уюму саммитинде документтер менен бекемдөө зарылдыгын белгилешти.
