Кыргызстан менен Грузия салыктык башкаруу жаатында тажрыйба алмашат
Мамлекеттик салык кызматынын төрагасы Алмамбет Шыкмаматов Грузиянын жергиликтүү салык органынын ишмердүүлүгү менен таанышып, эки өлкөнүн салык системалары ортосундагы кызматташууну кеңейтүүгө багытталган бир катар жолугушууларды өткөрдү.
Маалыматка ылайык, иш сапардын жүрүшүндө ал Грузиянын Каржы министрлигине караштуу Кирешелер кызматынын жетекчиси Михаил Маглакелидзе менен жолугушуп, салыктык жана бажылык башкарууну өркүндөтүү, санариптик кызматтарды жакшыртуу маселелерин талкуулады.
Тараптар тажрыйба алмашууну кеңейтүү жана салыктык башкаруунун натыйжалуулугун жогорулатуу боюнча жүргүзүлүп жаткан иштердин маанисин белгилешти. Грузияда ишке ашырылган реформалар ийгиликтүү тажрыйбанын үлгүсү экени айтылып, Кыргызстанда да салык кызматын жаңылоо, санариптик чечимдерди киргизүү боюнча иштер улантылып жатканы белгиленди.
Ошондой эле Кыргызстанда акыркы жылдары экономикалык өсүш байкалып, салыктан түшкөн каражаттар олуттуу көбөйгөнү маалымдалды. Экономиканын негизги тармактары катары өнөр жай, кызмат көрсөтүү жана айыл чарба тармагы көрсөтүлдү.
Грузия тарап эки өлкөнүн ортосундагы достук мамилелерди белгилеп, окшош экономикалык мүмкүнчүлүктөргө ээ мамлекеттер катары кызматташтыкты тереңдетүүгө кызыкдар экенин билдирди.
Иш сапардын жыйынтыгында Кыргызстан менен Грузиянын салык кызматтары ортосунда кызматташуу жөнүндө меморандумга кол коюлуп, ал тажрыйба алмашууну кеңейтүү, санариптештирүү, аналитика жана салыктык башкарууну өркүндөтүү багыттарында өз ара аракеттенүүнү бекемдөөгө багытталды.
