Мамлекеттик кызматтарды тездетүү боюнча 100 күндүк реформа башталды
29-июнда "Ынтымак Ордо" резиденциясында өткөн жыйында Министрлер кабинетинин төрагасы Адылбек Касымалиев 100 күндүк реформалар расмий түрдө башталганын билдирди. Бул тууралуу өкмөттүн басма сөз кызматы маалымдады.
Жаңы демилгелер мамлекеттик кызмат көрсөтүүлөрдү санарипке өткөрүүгө жана кагаз иштерин азайтууга багытталган.
Биринчи этапта финансылык институттардагы күрөөнү алып салуу иштерин жөнөкөйлөтүү каралууда. Учурда мындай операциялар кыймылсыз мүлк менен жүргүзүлгөн бүтүмдөрдүн дээрлик жарымын түзөт. 2026-жылдын биринчи беш айында эле 34 миңден ашык ушундай каттоо жүргүзүлгөнү белгиленди.
Адылбек Касымалиевдин айтымында, учурдагы негизги көйгөй — банктар менен кыймылсыз мүлктүн мамлекеттик реестринин ортосунда түз санарип маалымат алмашуунун жоктугу.
Бул маселени чечүү үчүн 100 күндүн ичинде “Түндүк” тиркемеси аркылуу күрөөнү алып салууну онлайн каттоо кызматы ишке киргизилет. Жаңы система аркылуу арыздарды аралыктан берүү, ошондой эле банктар тарабынан электрондук кол тамга жана “Е-Нотариат” системасы аркылуу текшерүү жүргүзүү мүмкүн болот. Натыйжада иш мөөнөтү бир нече күндөн беш саатка чейин кыскартылары күтүлүүдө.
Экинчи багыт катары 16 жаштан 23 жашка чейинки студенттердин багуучусунан айрылгандыгы боюнча жөлөкпулдарын жана пенсиялык төлөмдөрдү автоматташтыруу каралды.
Учурда студенттер жыл сайын кагаз түрүндө окууга кабыл алынганын тастыктоого мажбур болуп келет. Бул иш социалдык төлөмдөрдүн кечеңдешине жана кошумча чыгымдарга алып келери белгиленди.
Жаңы система “Түндүк” тиркемеси аркылуу билим берүү мекемелеринин маалымат базаларын Социалдык фонд жана Эмгек министрлигинин системалары менен байланыштырууну карайт.
Жыйынтыгында Адылбек Касымалиев эки багыт боюнча тең 100 күндүк мөөнөттө натыйжа чыгарууну тапшырды.
